Padrodado Fogar de Bergantiños

Candidatos

BUSCADOR: Por categoría:
Por nome:

Milagros Cotelo

Nacida en Carballo un 7 de novembro de 1959, concretamente na parroquia de Bértoa, Milagros Cotelo Rama é a segunda de seis irmáns.
 Aínda que xa desde que contaba con poucos meses de vida lle apreciaron problemas de mobilidade, foi en torno aos cinco anos cando a raíz da rotura dunha perna, que a mantivo inmobilizada durante moito tempo, acabóuselle diagnosticando artrite reumatoide no seu grao máximo. Por iso, desde pequena necesitou sempre da súa familia para poder desprazarse. Ademais, naqueles tempos os medios e recursos eran escasos, polo que non dispuxo da súa primeira cadeira de rodas ata os dez anos. Así permanece na retina dos carballeses a imaxe de Milagros, acompañada e impulsada en tódolos sentidos sempre polo seu pai Manolo “O Barrendeiro”, e desde a súa desaparición, polos seus irmáns.
 Non sabe moi ben cando lle empezou a afección á pintura, aínda que recorda que xa de pequena debuxaba e pintaba continuamente, copiando as ilustracións dos libros de texto dos seus irmáns.
 Pasados os anos, creouse o Centro Cultural Alfredo Brañas, que ofertaba entre as súas actividades clases de debuxo e de pintura, polo que Milagros decidiu anotarse, sendo aí onde recibiu as primeiras clases básicas.
 Por aqueles tempos participou nalgunha exposición colectiva co resto de alumnos do Centro Cultural, pero tamén xa expuxo en solitario na Casa da Xuventude de Carballo, con obras de naturezas mortas, parte a lapis e parte a óleo, e paisaxes a óleo.
 Hai uns dez anos en Carballo houbo unha explosión de inquedanzas artísticas. E froito dese bule bule, en 2007, coincidindo coas festas do San Xoán, organizouse unha exposición colectiva no Pazo da Cultura, que sería o xermolo da “Asociación Cultural Creaformas Artísticas”, constituída en 2013 coa participación da nosa galardoada. Creaformas busca dinamizar a vida artística carballesa con obradoiros, exposicións, colaborando con outros colectivos... Entre as súas actividades destaca “Mercarte”, que se leva a cabo no Nadal na planta alta da Praza de Abastos de Carballo, ou “Arte na Rúa” ao finalizar o verán.
 Hai uns anos xurdiu a idea de converter muros e fachadas de edificios en lenzos onde plasmar o arte pictórico. Pois Milagros Cotelo participou nunha actividade lúdica con nenos organizado por Senda Nova, e tamén no Proxecto Europeo “Xen”.
 A obra de Milagros é ecléctica, aínda que di que ten debilidade pola temática social. Non se limita a unha soa técnica pictórica, senón que realiza obras de debuxo a lapis e bolígrafo e acuarela fundamentalmente para ilustración, deixando a pintura ao óleo para formatos grandes. Xa conta cunha prolífica obra, e participou en moitos eventos e exposicións. A modo de exemplo podemos destacar tres edicións do concurso de pintura ao aire libre Álvarez de Sotomayor, que se desenvolve en Ponteceso; en 2014 foille concedido o Premio Mª José Jove ao esforzo; e tamén colaborou no libro editado polo Concello de Carballo “Contos de Taberna”, ilustrando un texto de Xurxo Borrazás. As súas obras puidéronse ver ata agora, ademais de en Carballo, en Malpica, Muxía, A Coruña, ... E hai poucas semanas rematou unha exposición súa na galería de arte Garabato de Carballo.
 É moi activa participando en distintas actividades relacionadas coa diversidade funcional, tanto desde o punto de vista divulgativo como reivindicativo, intervindo nun programa da TVG, ou en xornadas organizadas por distintos colectivos, en centros educativos, etc. Ela pensa que o máis importante é “facerse visible”.
 Como promotora e defensora dos altos valores artísticos e de superación, recollendo o sentir popular desta comunidade, vimos en proclamala CARBALLESA DO ANO 2.016.

Currículum

Edicións nas que foi nominado:

Edición Categoría Galardóns Foto do acto de entrega Descargas Méritos
carballés galardoado Unha das pintoras máis queridas de Carballo que empezou a interesarse pola arte desde moza. Hai uns vinte anos, cando decidiu empezar a dar clases de pintura na Casa da Xuventude, chegoulle a primeira oportunidade de expoñer en público as súas creacións. Desde hai pouco, preside o colectivo carballés de artistas Crea Formas, que axudou a fundar en 2008.
Video acto de entrega
  • Concello de Laracha
  • Concello de Cabana
  • Concello de Carballo
  • Concello de Coristanco
  • Concello de Laxe
  • Concello de Malpica
  • Concello de Ponteceso
  • Abertal Networks S.L.
Fundacion Luis Calvo Sanz